My Secret 有自己首個廣告！

首先祝各位新年快樂！

1月8號朝早個人特別興奮因爲鋪頭拍第一個電視廣告！上一晚我仲訓唔著添，夜晚起咗幾次身。而家開始眼訓...雖然個廣告唔係啲咩大廣告~

如果冇記錯，喺上年大約12月頭，我地就同澳門嘅好傳媒開咗幾次會．爲咗配合公司日後發展，我地決定爲公司拍第一個廣告！

好傳媒係一間澳門嘅製作媒體公司．佢地算係澳門第一間以「超越媒體界限，突破固有空間」」為經營概念的影像製作媒體．其實而家澳門circle k同巴士裡面個啲電視都係佢地㗎！大家應該記得Kary拍個Love more 面膜廣告其實都係佢哋拍㗎！佢哋website仲有好多唔同嘅節目，你地可以去睇下: http://www.good.com.mo

佢地嗰朝5點已經開始喺佢哋office拍，之後就嚟漁人碼頭同鋪頭拍攝。過程其實都幾得意，因爲自己未試過！好彩我自己都有錄起咗，之後可以放喺youtube.

好期待廣告個draft，想快啲自己睇下！新一年，新開始，廣告裡面亦有 My Secret新嘅發展，呢個我地都未講俾其它人知。想一次過公開！

今次真係好多謝伍家怡再次幫我地 (上一次已經係我地上年開張嘅時候），亦都好多謝好傳媒嘅咁多位！同好傳媒算係第一次合作，之前開張係同棋人娛樂 & 佢地嘅marketing team。

廣告一出我會第一時間話俾大家知！